مراد علی شاہ یا کوئی اور، بلاول بھٹو نے وزیراعلی سندھ کے نام کا اعلان کردیا

                   کراچی (نیوز ڈیسک) مراد علی شاہ یا کوئی اور، بلاول بھٹونے وزیراعلی سندھ کے نام کا اعلان کردیا، جمعہ کو ہونے والے پیپلز پارٹی کی مرکزی مجلس عامہ کے اجلاس میں پارٹی چئیرمین نے مراد علی شاہ کو ہی وزیراعلی سندھ بنانے کی منظوری دی۔ تفصیلات کے مطابق پاکستان میں 2 روز قبل ہونے والے عام انتخابات 2018 کے غیر سرکاری غیر حتمی نتائج آنے کا سلسلہ جاری ہے۔

اب تک موصول ہونے والے غیر سرکاری غیر حتمی نتائج کے مطابق وفاق میں تحریک انصاف حکومت بنانے کی پوزیشن میں آ چکی ہے۔ جبکہ خیبرپختوںخواہ بھی تحریک انصاف اورسندھ میں پیپلز پارٹی دوبارہ حکومت بنانے کی پوزیشن میں ہیں۔ پیپلز پارٹی سندھ میں مسلسل تیسری مرتبہ حکومت بنانے کی پوزیشن میں ہے۔

سندھ سے موصول ہونے والے غیر سرکاری غیر حتمی انتخابی نتائج کے مطابق پیپلز پارٹی کل 130 میں سے 73 صوبائی اسمبلی کی نشستوں پر برتری حاصل کیے ہوئے ہے۔

جبکہ تحریک اںصاف 23 صوبائی نشستوں پر برتری حاصل کرکے دوسرے نمبر پر ہے۔ پیپلز پارٹی کو حکومت بنانے کیلئے 65 نشستوں پر فتح درکار ہے۔ جبکہ اب تک موصول ہونے والے غیر سرکاری غیر حتمی نتائج سے یہ واضح ہو گیا ہے کہ پیپلز پارٹی مطلوبہ تعداد سے زیادہ نشستیں جیتنے میں کامیاب رہی ہے۔ ایسے میں اب پیپلز پارٹی نے صوبائی حکومت کی تشکیل کیلئے تیاریاں شروع کردی ہیں۔

اس سلسلے میں پیپلز پارٹی نے وزیراعلی سندھ کے نام کا اعلان بھی کر دیا ہے۔ پیپلز پارٹی کے ترجمان مولا بخش چانڈیو کی جانب سے اعلان کیا گیا ہے کہ سندھ میں اس مرتبہ بھی مراد علی شاہ ہی وزیراعلی کا عہدہ سنبھالیں گے۔ جبکہ بلاول بھٹو کے وزیراعلی سندھ بننے کا کوئی امکان نہیں ہے۔ اس حوالے سے جمعہ کو ہونے والے پیپلز پارٹی کی مرکزی مجلس عامہ کے اجلاس میں بھی پارٹی چئیرمین بلاول بھٹو نے مراد علی شاہ کو ہی وزیراعلی سندھ بنانے کی منظوری دی اور اس کے باقاعدہ اعلان بھی کیا۔ دوسری جانب سندھ میں اس مرتبہ حزب اختلاف کو تحریک اںصاف لیڈ کرنے کی پوزیشن میں ہے۔